Track BTT Aliron Barakaldo

Deskribapena eta interesguneak

Altzairuzko Birika trackarekin batera, ibilbide hau luzeenetako bat da.

Gorostitzako kiroldegitik abiatuta, Barakaldoko Errekatxo auzo ederrera joango gara. Iritsi ondoren, mendirantz hartuko dugu bidea eta igotzen hasiko gara. Kontuz igoeraren hasieran gurutzatuko dugun ibaiarekin. Zentimetro gutxiko sakonera duen arren, korronte indartsua du eta lirdinga dago lurrean. Laster zubi berri bat eraikiko da eta ibaia gainetik igarotzeko gai izango gara.

Zementuzko lehen arrapalak oso gogorrak dira, baina gero leundu egiten da Loiolako urtegia ikusten dugunean. Trackari jarraituko diogu landaretza lodiko eremu batean sartu arte, inolako erreferentzia bisualik gabe. Gaztaineta eta Saratxo auzoetara iristean bakarrik berreskuratuko dugu orientazioa. Zementuzko errepide estu batek lotzen ditu bi auzoak. 3 edo 4 etxe besterik ez dira, eta bisitariak harrituta gelditzen dira beti, inguru txikia delako. Pista zabal eta oso trinko batek Eretzaren mendi-hegalak(inguruko tontorrik garaiena) inguratzen ditu, trackak une batez bidetik desbideratzen gaituen arte, begiratoki gisa erabiltzen den zelai batera sartu eta irteteko. Mendiko aterpea dugu aurrean, baina zelai honetatik ikuspegi hobeak ditugu. Gailurra justu gure atzean dago, baina bertara ibiltzen bakarrik igo daiteke. Bideko iturburu bakarra ere hementxe dago, udan lehortu egin daitekeen arren. Ondoren, Kurutzagara desbideratuko gara. Mendixkaz, muinoz eta belardi berdez betetako paisaiarekin egingo dugu topo. Kurutzaga harrizko mendigunea da eta ezin da bizikletaz igo, baina gailurretik oso gertu dagoen basera joango gara. Batzuk bizikletatik jaisten dira une batez eta tontorrera igotzen ausartzen dira, baina kontuan izan behar da txirrindularitzako oinetakoak ez direla oso egokiak horretarako. Hala ere, Gasteran mendiaren gailurrera (801 metro) joan gaitezke, ibilbidearen erdira eta tarterik altuenera iritsi garela ospatzeko. Sustrai eta adar gurutzatuz betetako baso ilun batetik jaitsiko gara hasieran; poliki joan behar da bidea ondo aukeratzeko. Arenako baso-pisten bidegurutzera iritsiko gara, eta hau une egokia da fisikoki nola gauden ikusteko. Izan ere, hemen garaiz erretiratu gaitezke eta ibilbidetik irten pista nagusitik behera. Kontuan izan behar da hemendik aurrera buelta luze bat emango dugula mendiaren hegoaldetik (Trapagaran iparraldean), ibilbidea uzteko aukerarik gabe.

Aurrera egitea erabakitzen badugu, El Saucon sartuko gara. Gune hori ezaguna da lurrean dituen pitzadura handiengatik eta meatzaritzako iragan historikoagatik. Magdalenako leizea da kokagune ospetsuenetako bat, eta bide zahar hautsi eta higatu batetik jaitsiko gara bertara. Trebeenak ziurrenik ausartuko dira bizikleta gainean jaisten, baina inguruneari eta bisitari ugariei zor diegun errespetuagatik, bizikletatik jaisteko eskatzen dizugu. 300 metro bakarrik jaitsi ondoren, Uraiagako landa-kokalekura iritsiko gara. Kobazuloko sarrera ikusgarria da, kapera bat dago barruan, eta mugikorraren argia piztuz gero, garai batean meatzariek burdina ateratzen zuten plano inklinatua ikus daiteke. Kobazuloa ondo bisitatu ondoren, eta berriro igo ezin denez, mendi erdiraino jaisten den bide bakarrari jarraituko diogu. Hurrengo 15 kilometroetan, gora eta behera egingo dugu hainbat lursailetan eta hainbat ingurunetan zehar. Mendi osoa mendebaldeko muturretik inguratuko dugu, azkenean Zugaztietako herrigunera iritsi arte.

Hainbeste kilometroren ondoren, Trapagarango goiko auzo horretara iristea ospatzekoa da, baita bertako lokalen batean zerbait hartzeko arrazoia ere. Los Pozos zeharkatu eta Larreineta auzoan zehar tracketik irtetea besterik ez zaigu geratzen. Beherantz goazela, tracka antzinako meatze-kargategi batera sartzen da. Orain, begiratoki gisa erabiltzen da. Bistak ikusteko azken unea da hau. Ondoren, Trapagaranera jaitsiko gara, Funikularrarekin paraleloak diren pistetatik. Azken txanpan, hipika bat inguratzen duen trial-bide bat igaroko dugu, Zaballako auzora iritsi arte (Trapagaran).

Hemendik aurrera Barakaldora itzultzea besterik ez zaigu geratzen ibilbidea amaitzeko. Errepidea saihesteko, lehenik Durañona auzorantz (Trapagaran) igoko gara, eta, gero, Supersur autobidearen azpitik igaroko gara, tunel batzuetan barrena. Beharrezkoa izango da bizikletetan argiak eramatea. Agian mugikorreko linternak erabil ditzakegu, baina zail samarra izango da. Bide Berdea ez dago oso ondo zainduta, baina trukean N-634ko trafikoa saihesten dugu. Barakaldora iritsi ondoren, industria-pabiloi zahar batzuk zeharkatuko ditugu, eta, gero, Tellaetxe parkera joango gara. Handik, Gorostitzako kiroldegira iritsiko gara, abentura amaitzeko.